EL ÇENTENARIO
Composizione del noto Poeta bassanese Gino Pistorello, dedicata alla Festa Votiva della Madonna del Rosario e presentata al pubblico Venerdì 5 Ottobre 1979 in occasione del primo Centenario della Festa, durante la Conferenza di Mons. G. Mantese su “ Le origini e la storia del Monastero di San Fortunato”
No’ ocorea calendari,
quando le foje verde
de vizea
se vestiva de zalo
e se impissava
i rami dei fagari
cascava la Madonna del Rosario
Primo giorno de scola:
se sentiva ne’ l’aria
odor de inchiostro
e de quaderni novi
pensando più a la Sagra
che al maestro
e se partiva a s-ciapi
cussì dopo poenta
verso San Fortunà
la ciesa dai mil’ani
posà
eremo dolçe
tra i orti verdi
e i malagragni rossi
dove se slarga e se desgropa
el Brenta.
Mi ancò de questa Sagra
penso che fasso
mezo çentenario
e vojo ritrovar
quei ani bei
coi gusti dei putei:
el sucaro fià
i maroni sue bronse
e tante barachete lineàe
che vendea ciavarie de banda lustra,
‘nà procession
che nò finiva mai
cò la Madona Santa
portà da omeni forti
e i foghi artificiai
che disegnava el scuro.
Ma più de tuto
coi oci spalancai
se vardava imagài
el balon grando
fato de gran colori
el fogo soto
che ‘ndava proprio in çeo.
Scavando in fondo ai ani
vedo ‘ncora el balon
un fià nebià
dal rosegar del tempo
e me torna
‘na musica lontana.